โส จ พุทฺโธ อสมสโม, คุณานิ จ ตานิ อตุลิยานิ;
สพฺพํ ตมนฺตรหิตํ, นนุ ริตฺตา สพฺพสงฺขาราฯ
[36]
สุชาโต ชินวโร พุทฺโธ, สิลารามมฺหิ นิพฺพุโต;
ตตฺเถว ตสฺส เจติโย [ตตฺเถว เจติโย สตฺถุ (สฺยา. กํ.)], ตีณิคาวุตมุคฺคโตติฯ
สุชาตสฺส ภควโต วํโส ทฺวาทสโมฯ
15. ปิยทสฺสีพุทฺธวํโส
[1]
สุชาตสฺส อปเรน, สยมฺภู โลกนายโก;
ทุราสโท อสมสโม, ปิยทสฺสี มหายโสฯ
[2]
โสปิ พุทฺโธ อมิตยโส, อาทิจฺโจว วิโรจติ;
สพฺพํ ตมํ นิหนฺตฺวาน, ธมฺมจกฺกํ ปวตฺตยิฯ
[3]
ตสฺสาปิ อตุลเตชสฺส, อเหสุํ อภิสมยา ตโย;
โกฏิสตสหสฺสานํ, ปฐมาภิสมโย อหุฯ
[4]
สุทสฺสโน เทวราชา, มิจฺฉาทิฏฺฐิมโรจยิ;
ตสฺส ทิฏฺฐิํ วิโนเทนฺโต, สตฺถา ธมฺมมเทสยิฯ
[5]
ชนสนฺนิปาโต อตุโล, มหาสนฺนิปตี ตทา;
นวุติโกฏิสหสฺสานํ, ทุติยาภิสมโย อหุฯ
[6]
ยทา โทณมุขํ หตฺถิํ, วิเนสิ นรสารถิ;
อสีติโกฏิสหสฺสานํ, ตติยาภิสมโย อหุฯ
[7]
สนฺนิปาตา ตโย อาสุํ, ตสฺสาปิ ปิยทสฺสิโน;
โกฏิสตสหสฺสานํ, ปฐโม อาสิ สมาคโมฯ
[8]
ตโต ปรํ นวุติโกฏี, สมิํสุ เอกโต มุนี;
ตติเย สนฺนิปาตมฺหิ, อสีติโกฏิโย อหูฯ
[9]
อหํ เตน สมเยน, กสฺสโป นาม พฺราหฺมโณ [มานโว (สฺยา. กํ.)];
อชฺฌายโก มนฺตธโร, ติณฺณํ เวทาน ปารคูฯ
[10]
ตสฺส ธมฺมํ สุณิตฺวาน, ปสาทํ ชนยิํ อหํ;
โกฏิสตสหสฺเสหิ, สงฺฆารามํ อมาปยิํฯ
[11]
ตสฺส ทตฺวาน อารามํ, หฏฺโฐ สํวิคฺคมานโส;
สรเณ ปญฺจ สีเล จ [สรณํ ปญฺจสีลญฺจ (สี.)], ทฬฺหํ กตฺวา สมาทิยิํฯ
[12]
โสปิ มํ พุทฺโธ พฺยากาสิ, สงฺฆมชฺเฌ นิสีทิย;
‘‘อฏฺฐารเส กปฺปสเต, อยํ พุทฺโธ ภวิสฺสติฯ
[13]
‘‘ปธานํ ปทหิตฺวาน…เป.… เหสฺสาม สมฺมุขา อิมํ’’ฯ
[14]
ตสฺสาปิ วจนํ สุตฺวา, ภิยฺโย จิตฺตํ ปสาทยิํ;
อุตฺตริํ วตมธิฏฺฐาสิํ, ทสปารมิปูริยาฯ
[15]
สุธญฺญํ นาม นครํ, สุทตฺโต นาม ขตฺติโย;
จนฺทา นามาสิ ชนิกา, ปิยทสฺสิสฺส สตฺถุโนฯ
[16]
นววสฺสสหสฺสานิ, อคารํ อชฺฌ โส วสิ;
สุนิมฺมลวิมลคิริคุหา, ตโย ปาสาทมุตฺตมาฯ
[17]
เตตฺติํสสหสฺสานิ จ, นาริโย สมลงฺกตา;
วิมลา นาม นารี จ, กญฺจนาเวโฬ นาม อตฺรโชฯ
[18]
นิมิตฺเต จตุโร ทิสฺวา, รถยาเนน นิกฺขมิ;
ฉมาสํ ปธานจารํ, อจรี ปุริสุตฺตโมฯ
[19]
พฺรหฺมุนา ยาจิโต สนฺโต, ปิยทสฺสี มหามุนิ;
วตฺติ จกฺกํ มหาวีโร, อุสภุยฺยาเน มโนรเมฯ
[20]
ปาลิโต สพฺพทสฺสี จ, อเหสุํ อคฺคสาวกา;
โสภิโต นามุปฏฺฐาโก, ปิยทสฺสิสฺส สตฺถุโนฯ
[21]
สุชาตา ธมฺมทินฺนา จ, อเหสุํ อคฺคสาวิกา;
โพธิ ตสฺส ภควโต, กกุโธติ ปวุจฺจติฯ
[22]
สนฺธโก ธมฺมโก เจว, อเหสุํ อคฺคุปฏฺฐกา;
วิสาขา ธมฺมทินฺนา จ, อเหสุํ อคฺคุปฏฺฐิกาฯ
[23]
โสปิ พุทฺโธ อมิตยโส, ทฺวตฺติํสวรลกฺขโณ;
อสีติหตฺถมุพฺเพโธ, สาลราชาว ทิสฺสติฯ
[24]
อคฺคิจนฺทสูริยานํ, นตฺถิ ตาทิสิกา ปภา;
ยถา อหุ ปภา ตสฺส, อสมสฺส มเหสิโนฯ
[25]
ตสฺสาปิ เทวเทวสฺส, อายุ ตาวตกํ อหุ;
นวุติวสฺสสหสฺสานิ, โลเก อฏฺฐาสิ จกฺขุมาฯ
[26]
โสปิ พุทฺโธ อสมสโม, ยุคานิปิ ตานิ อตุลิยานิ;
สพฺพํ ตมนฺตรหิตํ, นนุ ริตฺตา สพฺพสงฺขาราฯ
[27]
ปิยทสฺสี มุนิวโร, อสฺสตฺถารามมฺหิ นิพฺพุโต;
ตตฺเถวสฺส ชินถูโป, ตีณิโยชนมุคฺคโตติฯ
ปิยทสฺสิสฺส ภควโต วํโส เตรสโมฯ
16. อตฺถทสฺสีพุทฺธวํโส
[1]
ตตฺเถว มณฺฑกปฺปมฺหิ, อตฺถทสฺสี มหายโส;
มหาตมํ นิหนฺตฺวาน, ปตฺโต สมฺโพธิมุตฺตมํฯ
[2]
พฺรหฺมุนา ยาจิโต สนฺโต, ธมฺมจกฺกํ ปวตฺตยิ;
อมเตน ตปฺปยี โลกํ, ทสสหสฺสิสเทวกํฯ
[3]
ตสฺสาปิ โลกนาถสฺส, อเหสุํ อภิสมยา ตโย;
โกฏิสตสหสฺสานํ, ปฐมาภิสมโย อหุฯ
[4]
ยทา พุทฺโธ อตฺถทสฺสี, จรเต เทวจาริกํ;
โกฏิสตสหสฺสานํ, ทุติยาภิสมโย อหุฯ
[5]
ปุนาปรํ ยทา พุทฺโธ, เทเสสิ ปิตุสนฺติเก;
โกฏิสตสหสฺสานํ, ตติยาภิสมโย อหุฯ
[6]
สนฺนิปาตา ตโย อาสุํ, ตสฺสาปิ จ มเหสิโน;
ขีณาสวานํ วิมลานํ, สนฺตจิตฺตาน ตาทินํฯ
[7]
อฏฺฐนวุติสหสฺสานํ , ปฐโม อาสิ สมาคโม;
อฏฺฐาสีติสหสฺสานํ, ทุติโย อาสิ สมาคโมฯ
[8]